«Թուրքիայի բոլոր հայտարարություններն այն մասին, որ նա խոսքի բացառիկ իրավունք ունի Նախիջևանի հարցում և հանդիսանում է նրա երաշխավորը, անհիմն են: Այդ մասին Երևանում լրագրողներին է ասել Հայոց ցեղասպանության թանգարան-ինստիտուտի տնօրեն Հայկ Դեմոյանը: Նրա խոսքերով, որքան Թուրքիան իրավունք ունի Նախիջևանի հանդեպ, նույնքան իրավունք ունի նաև Հայաստանը, քանի որ Կարսի պայմանագրի տակ, որով որոշվեց Նախիջևանի կարգավիճակը, ստորագրել են Հայկական, Ադրբեջանական ԽՍՀ-ներն ու Թուրքիան, ՌԽՍՖՀ մասնակցությամբ:
«Ելնելով ստեղծված իրավիճակից, Հայաստանը, որպես միջազգային իրավունքի սուբյեկտ, լիակատար իրավունք ունի դիմել միջազգային դատարան Նախիջևանի կարգավիճակի խախտման վերաբերյալ կամ քննարկել այն որպես միջազգային պայմանագրերի խախտում»,-ասել է Դեմոյանը: Նրա խոսքերով, Նախիջևանի կարգավիճակի հարցում խախտվել են Հայաստանի իրավունքները: «Թուրքական կողմը լավ է հասկանում, որ Նախիջևանի հարցում կողմերի իրավունքները հավասար են»,-ասել է հայ փորձագետը:
