Հարավային Կովկասի վերաբերյալ Եվրախորհրդարանի բանաձևը թերի է, նույնիսկ չնայած նրան, որ այնտեղ կան հայկական կողմի համար նաև բարենպաստ դրությներ: Այդ փաստաթղթում անհեթեթ մի կետ կա Ղարաբաղի վերաբերյալ, հիմնված բուլղարացի պատգամավոր Եվգենի Կիրիլովի զեկույցի վրա: Այդ մասին ՀՀ ԱԺ-ում տեղի ունեցած ճեպազրույցի ժամանակ հայտարարել է Հայաստանի հանրապետական կուսակցության խորհրդարանական խմբակցության քարտուղար Էդուարդ Շարմազանովը:
Ըստ Շարմազանովի, զեկույցից պարզ է դառնում, որ Կիրիլովը իրազեկ չէ ղարաբաղյան խնդրին, երբեք չի եղել ԼՂՀ-ում և չի խորհրդակցել անգամ ԵԱՀԿ ՄԽ համանախագահների հետ: «Եթե բուլղարացի պատգամավորը խորապես հետազոտեր խնդիրը, ապա կտեսներ , որ իրոք գոյություն ունի բռնազավթված տարածքների խնդիր, սակայն դա վերաբերում է Շահումյանին, Գետաշենին ու Մարդակերտին: Նա նաև կիմանար, որ Ադրբեջանն է սկսել ԼՂՀ բռնազավթումը, ոչ թե հակառակը»,-ասել է Շարմազանովը:
Նա նաև կոչ է արել եվրոպական պատվիրակություններին ուշադիր հետևել ԼՂՀ-ում կայանալիք խորհրդարանական ընտրություններին, քանի որ դա նրանց կօգնի հասկանալ, որ ժողովրդավարությունն Արցախում շատ ավելի բարձր է, քան Ադրբեջանում:
Մայիսի 20-ին Եվրախորհրդարանում տեղի ունեցան բանավեճեր Հայաստանի, Վրաստանի և Ադրբեջանի հետ Եվրոպայի փոխհարաբերությունների շուրջ: Այդ թեմայով բանաձև ներկայացրեց բուլղարացի եվրապատգամավոր Սոցիալիստների և դեմոկրատների խմբին հարող Եվգենի Կիրիլովը: Փաստաթղթում անհանգստությում է արտահայտվում տարածաշրջանում ռազմական ծախսերի աճի հետ կապված և կոչ է արվում «դուրս բերել հայկական զորքերն Ադրբեջանի բռնազավթված տարածքներից»: Եվրախորհրդարանը կոչ արեց կողմերին ակտիվացնել խաղաղ բանակցությունները տարածաշրջանում կայունություն հաստատելու համար: «ԵՄ-ը վճռականապես դատապարտում է ուժի կիրառման հնարավորությունն այդ հակամարտության լուծման համար, դրա կիրառումն արդեն բացասաբար է անդրադարձել տարածաշրջանի վրա և լուրջ հետևանքներ է առաջացրել տեղի բնակչության համար,- ասվում է բանաձևում: - Երկու կողմերն էլ պետք է անպայման հավատարիմ մնան 1994-ին կնքված հրադադարի մասին համաձայնագրին»: Պատգամավորներն անհագստություն են արտահայտել այն առիթով, որ «հարյուր հազարավոր փախստականներ չեն կարողանում վերադառնալ հայրենիք, իսկ նրանց իրավունքները, ներառյալ վերադարձի, սեփականության և անձնական անվտանգության իրավունքը, ոտնահարվում են: «Մենք կոչ ենք անում հաշվի առնել տեղահանված մարդկանց շահերը միջազգային իրավունքի սկզբունքներին համապատասխան»,- ընդգծել են նրանք: