Ենոքավան գյուղում գտնվող «Ապագատուր» զբոսաշրջային համալիրի փորձը լավ օրինակ կարող է ծառայել Հայաստանի մարզերում զբոսաշրջության զարգացման համար, ասել է Հայաստանի վարչապետ Տիգրան Սարգսյանը` Տավուշի մարզ կատարած այցի ընթացքում:
«Ապագատուր» զբոսաշրջային համալիրը գտնվում է Ենոքավան գյուղից 4 կմ հեռավորության վրա: Այն ակտիվ հանգստի գոտի է: ԽՍՀՄ-ի տարիներին համալիրի տարածքում ոչխարաբուծական ֆիրմա էր գտնվում, որը ԽՍՀՄ փլուզումից հետո այլևս չէր օգտագործվում:
Ներկայում համալիրի տերերը ձիեր են բուծում: Այդ ձիերն օգտագործվում են 3-15-օրյա ձիարշավներ կազմակերպելու համար:
Զբոսաշրջային այդ համալիրի կառուցման համար ներդրվել են հսկայական գումարներ: Ներդրումները շարունակվում են նաև հիմա, որի շնորհիվ «Ապագատուրը» կարող է դառնալ երկրի խոշորագույն զբոսաշրջային համալիրներից մեկը: