Իլհամ Ալիևը պահանջում է, որպեսզի ԵԱՀԿ ՄԽ համանախագահները պարտադրեն Հայաստանին ընդունել նորացված Մադրիդյան սկզբունքները

10 հունիսի 2010 - 11:25 AMT

PanARMENIAN.Net - «Մենք ԵԱՀԿ Մինսկի խմբի բոլոր համանախագահ երկրներից ակնկալում ենք, որ նրանք հայկական կողմից վրա շատ լուրջ ազդեցություն կունենան: Ներկա պահին ղարաբաղյան հակամարտության կարգավորման բանակցային գործընթացում նոր փուլ է սկսվում, որը տարբերվում է մյուսներից»,- հայտարարել է Իլհամ Ալիևը: Նրա խոսքերով, այսօր այնպիսի փուլի ենք հասել, երբ բանակցությունների սեղանին նորացված Մադրիդյան սկզբունքների հիման վրա արդեն գտնվում են առաջարկներ, որոնք «Պրահայի գործընթացի» շարունակությունն են: Ալիևը նշել, որ ադրբեջանական կողմը հասկանում է դա, իսկ հայկական կողմը` ոչ: Նա կարծում է, որ եթե այդպես շարունակվի, ապա հարցը կամ առկախ կմնա, այսինքն ստատուս քվոն կշարունակվի, ինչը Բաքուն չի կարող ընդունել, կամ բանակցություններն առերևույթ կշարունակվեն, որի հետ Ադրբեջանը երբեք չի համաձայնի: «Ես բազմիցս ասել եմ, որ մենք իմիտացիայի համար չենք մասնակցի բանակցություններին այնքան ժամանակ, քանի դեռ մենք արդյունքի հասնելու հույս չենք ունենա: Կամ էլ հարցը դուրս կգա սառեցված վիճակից և կտեղափոխվի այլ հարթություն: Այսինքն, գաղտնիք չէ, որ դա ռազմական տարբերակն է»,- ասել է Ադրբեջանի նախագահը: Նրա խոսքերով, տվյալ տարբերակը երբեք չի բացառվել և չի բացառվում: «Եվ այսօր մենք պետք է մշտապես պատրաստ լինենք այդ տարբերակին: Այժմյան փուլն իր տրամաբանությունն ու նշանակությունն ունի. Հայաստանի, ինչպես նաև համանախագահ երկրների կողմից ձեռնարկվող քայլերը կորոշեն, թե ինչ ճանապարհով կլուծվի այդ հարցը»,- ասել է նա:

«Մենք ցանկանում ենք, որ ԵԱՀԿ ՄԽ համանախագահ երկրները, օգտագործելով իրենց հեղինակությունը և ազդեցությունը, հայկական կողմին լուրջ ազդանշաններ հղեն և ստիպեն ընդունել նորացված Մադրիդյան սկզբունքները, որպեսզի մենք դրանց հիման վրա սկսենք աշխատել խաղաղության պայմանագրի վրա»,- ընդգծել է Իլհամ Ալիևը, հաղորդում է ԱզերԹաժը:

Հղումներ թեմայով.

АзерТадж - ПРЕЗИДЕНТ ИЛЬХАМ АЛИЕВ В СТАМБУЛЕ ДАЛ ИНТЕРВЬЮ АЗЕРБАЙДЖАНСКИМ ЖУРНАЛИСТАМ