Այսօր Հայաստանի Նկարիչների միությունում հրաժեշտ են տվել ՀՀ վաստակավոր նկարիչ Վարուժան Վարդանյանին: Ներկա են եղել բարձրաստիճան պաշտոնյաներ, մշակույթի և արվեստի գործիչներ:
PanARMENIAN.Net-ի թղթակցի հետ զրույցում գրող Էդվարդ Միլիտոնյանն ասել է, որ ցավում է, որ մարդկանց տաղանդը չի գնահատվում կյանքի օրոք, այլ գնահատվում է միայն նրանց վախճանից հետո: «Հուսով եմ, որ հետագայում Վարուժան Վարդանյանի աշխատանքներն ավելի հայտնի կդառնան»,- ասել է Միլիտոնյանը:
Վարուժան Վարդանյանը ծնվել է 1948թ. հունիսի 22-ին ՀԽՍՀ Թումանյանի շրջանի Կաչագան գյուղում: Ավարտել է Երևանի գեղարվեստաթատերական ինստիտուտը:
1971-1974թթ. աշխատել է Հայաստանի ազգային հեռուստատեսությունում որպես արվեստների բաժնի խմբագիր: 1976-ից մասնակցել է հանրապետական և միութենական ցուցահանդեսների: 1976-ից Հայաստանի Նկարիչների միության անդամ էր: 2003-ին հայկական գեղարվեստում ունեցած ավանդի համար արժանացել է Հայաստանի վաստակավոչ նկարչի կոչման: