Հունիսի 18-ին Թուրքիայի առանձնակի ծանր հանցագործությունները հետաքննող 9-րդ դատարանը ազատ է արձակել 14 զինվորականների, որնց կասկածում էին պետական հեղաշրջում կազմակերպելու մեջ: Նրանց թվում է նաև բանակի նախկին հրամանատար, գեներալ Չեթին Դողանը և պաշտոնաթող գեներալ Էնգին Ալանը: Դատարանը գտել է, որ առկա հանցանշանները բավարար չեն զինվորականներին պատասխանատվության կանչելու համար:
Զինվորականները ձերբակալվել էին հեղաշրջման գործով, որը նախատեսվում էր իրագործել 2003 թվականին` Էրդողանի կառավարությունը տապալելու նպատակով: Գործը հարուցվեց Ստամբուլի դատախազության նախաձեռնությամբ, մի շարք ԶԼՄ-ներում բանակի «Մեծ մահակ» ծրագրի մասին սկանդալային հրապարակումներից հետո` ծրագրով նախատեսվում էր պայթյուններ կազմակերպել Ստամբուլի երկու մեջիթներում և արտակարգ դրություն հայտարարել, հաղորդում է «Հյուրիեթը»:
