Լեռնային Ղարաբաղի հարցում թուրք-ռուսական դաշինքի մասին խոսակցություններն անլուրջ են: Այդ մասին PanARMENIAN.Net-ի թղթակցի հետ զրույցում հայտարարել է ՀՀ ԳԱԱ արևելագիտության ինստիտուտի տնօրեն, պրոֆեսոր Ռուբեն Սաֆրաստյանը: Ըստ նրա, 2008թ. օգոստոսից հետո տարածաշրջանում նոր ստատուս-քվո ձևավորվեց և Ռուսաստանի դիրքերն ամրապնդվեցին: «Այս առումով ՌԴ-ն ոչ մի պատճառ չունի կիսել առաջնային դիրքերը Թուրքիայի հետ: Իսկ թուրքական կողմի հայտարարություններն ընդամենը ջուրը պղտորելու փորձեր են»,-ասել է Սաֆրաստյանը:

Նա ընդգծել է, որ ոչ մի այլ խաղաղապահ, եթե դրանց կարիքը լինի Ղարաբաղում, Ռուսաստանն ուղղակի թույլ չի տա: Ըստ արևելագետի, ամերիկացի խաղաղապահների ներկայությունը թույլ չի տա Իրանը:

Սանկտ Պետերբուրգում Սարգսյան-Ալիև հանդիպումից հետո որոշ ԶԼՄ-ներ տեղեկատվություն են տարածել Ռուսաստանի և ԱՄՆ-ի միջև ինչ-որ պայմանավորվածության մասին, որի համաձայն խաղաղապահներ են տեղակայվելու Ֆիզուլիում և Քելբաջարում: ԶԼՄ-ները նաև հղում են անում Բարաք Օբամայի և Ռեջեփ Թայիփ Էրդողանի միջև գաղտնի պայմանավորվածության վրա, որի համաձայն, իբր, երկու վերոհիշյալ շրջանները կվերադարձվեն Ադրբեջանին: