Հայաստանն, ինչպես Եվրամիությունը, կիսում է այն մոտեցումը, որի համաձայն տնտեսական տարածաշրջանային համագործակցությունը կարող է բարենպաստ ազդեցություն ունենալ տարածաշրջանի երկրների միջև առկա խնդիրների լուծման վրա: Այդ մասին Ավստրիայի ԱԳՆ ղեկավար Միխայել Շպիդելեգերի հետ համատեղ մամլո ասուլիսում հայտարարել է Հայաստանի ԱԳ նախարար Էդվարդ Նալբանդյանը:
Էդվարդ Նալբանդյանը նշել է, որ Հայաստանում կայուն տնտեսական դաշտ է ձևավորվել օտարերկրյա ներդրումների համար, որի վառ ապացույցն է բազմաթիվ օտարերկրյա ձեռնարկությունների գործունեությունը հանրապետությունում:
ՀՀ ԱԳՆ ղեկավարը հույս է հայտնել, որ ավստրիացի գործարարները, որոնք Հայաստան են այցելել Ավստրիայի ԱԳՆ պատվիրակության հետ, կքննարկեն համագործակցության հնարավորությունները հայ գործարարների հետ և կոնկրետ պայմանավորվածությունների կհասնեն: