Նախագահ Հեյդար Ալիեւի պաշտոնական այցը Թեհրան, որը նախատեսված էր սեպտեմբերի 17-19-ը, դարձյալ հետաձգվել է: CNA գործակալությանն այդ մասին հայտնելով, պետության ղեկավարի Գործադիր աշխատակազմում նշել են, որ այցի նոր ժամկետները կորոշվեն դիվանագիտական ուղիներով: Ոչ պաշտոնական աղբյուրների տվյալներով, նախագահի անընդհատ հետաձգվող այցը Իրան տեղափոխվել է ավելի ուշ ժամանակներ Նյու-Յորքում եւ Վաշինգտոնում տեղի ունեցած ահաբեկչական գործողությունների պատճառով: Ադրբեջանական առաջնորդը եւ նրա մերձավոր շրջապատը անվտանգության նկատառումներով վերանայել են այցերի ծրագիրը: Համաձայն իրանական դիվանագիտական աղբյուրների հայտարարությունների, ԻԻՀ պաշտոնական շրջանները Ալիեւի Թեհրան առաջիկա այցի ընթացքում մտադիր են առաջնահերթ բարձր մակարդակով քննարկել Կասպից ծովի կարգավիճակը: Հիշեցնենք, որ երկու երկրների միջեւ վիճաբանությունները Կասպից ծովի նավթային հանքավայրերի պատկանելիության վերաբերյալ, հանգեցրին հուլիսի վերջին Կասպից ծովի հարավային մասից ադրբեջանական հետազոտական «Գեոֆիզիկ-3» նավի վտարմանը, եւ այդ տարածքում «Բրիթիշ Պետրոլիում» ընկերության հետախուզական աշխատանքների դադարեցմանը: Լրատվության արտատպելու, կամ օգտագործելու դեպքում հղումը "PanARMENIAN.Net"-ի վրա պարտադիր է: