Սխալ կլինի, եթե թուրքական զորաբաժինը ՆԱՏՕ-ի զորավարժություններին մասնակցելու համար Հայաստան ժամանի հայ-թուրքական սահմանով: Բայց բանը նրանում է, որ Հայաստանը զորավարժություններին մասնակցելու է հրավիրել ոչ թե կոնկրետ Թուրքիային, այլ ՆԱՏՕ-ին: Միայն Ալյանսն իրավունք ունի որոշելու, թե ինչպես են ՆԱՏՕ-ի անդամ երկրներն իրենց զորաբաժիններն ուղղելու Հայաստան: Այդ մասին այսօր Երևանում կայացած մամլո ասուլիսում հայտնել է ՀՅ Դաշնակցության (ՀՅԴ) խորհրդարանական խմբակցության ղեկավար Վահան Հովհաննիսյանը:
Միևնույն ժամանակ Հովհաննիսյանը նշել է, որ Հայաստանը, այնուամենայնիվ, կարող էր ի սկզբանե պայման դնել, որպեսզի զինվորականներն այլ ճանապարհով ժամանեին: «Բայց ես ծանոթ չեմ այս գործընթացի մանրամասներին, ուստի չեմ կարող ավելի հանգամանալից մեկնաբանություն տալ այս առիթով»,- ընդգծել է նա:
