Անցյալի համեմատ, կարելի է ասել, որ հայ-ռուսական հարաբերություններն ակտիվացել են: Այս մասին Երևանում տեղի ունեցած մամլո ասուլիսի ժամանակ հայտարարել է Հայ դատի կենտրոնական գրասենյակի ղեկավար Կիրո Մանոյանը: Նրա խոսքերի համաձայն, Հայաստանի նոր ղեկավարության վարած քաղաքականության հարցում կողմերի միջև անորոշություն կար: Միաժամանակ նշել է, որ հայ-ռուսական հարաբերությունների ակտիվացման վկայությունն այն է, որ Ռուսաստանը որոշել է երկարաձգել Հայաստանում ռուսական ռազմաբազաների տեղակայման ժամկետը:
Կիրո Մանոյանը նաև որոշ անհանգստություն է արտահայտել այդ ցուցաբերած շտապողականության առիթով, քանի որ Հայաստանում ռուսական ռազմաբազաների գտնվելու ժամկետը լրանում է 2017 թ.: Նա նշել է, որ Ռուսաստանը փորձում է հավասարակշռել Հայաստանի և Ադրբեջանի հետ ռազմական համագործակցությունը: «Այսպիսով, Ռուսաստանը փորձում է տարածաշրջանում հավասարակշռություն պահպանել և կարգավորել ղարաբաղյան հակամարտությունը», - ասել է Կիրո Մանոյանը` ավելացնելով, որ միայն Ռուսաստանի ակտիվությունը տարածաշրջանում կարող է վտանգավոր լինել: Նրա խոսքերի համաձայն, տարածաշրջանում կայունության պահպանման համար անհրաժեշտ է նաև Եվրոպայի և ԱՄՆ-ի ներկայությունը:
