Օգոստոսի 19-ին Ռուսաստանի Նիժնի Նովգորոդի մարզում ԱԻՆ ԳՎ հանդիսությունների դահլիճում կայացավ Հայաստանի Արտակարգ իրավիճակների նախարարության` Նիժնի Նովգորոդի մարզի անտառային հրդեհների դեմ պայքարին մասնակցած 28 հրշեջների պարգևատրման արարողությունը: Հայ հրշեջներին շնորհվել են Ռուսաստանի ԱԻՆ «Հանուն փրկության համագործակցության համար» և «ԱԻ հետևանքների լիկվիդացման գործում աչքի ընկնելու համար» մեդալներ և արժեքավոր նվերներ: Արարողությանը մասնակցում էին փոխնահանգապետ Վլադիմիր Իվանովը և Նիժնի Նովգորոդի մարզում Ռուսաստանի ԱԻՆ ԳՎ պետ Ալեքսեյ Շիկանովը:
«Օգոստոսի 6-ից սկսած Հայաստանից ժամանած հրշեջները հանգցնում էին հրդեհները Մորդովիա հանրապետության անտառներում, իսկ օգոստոսի 12-ից հրդեհից պաշտպանում Պերվոմայի շրջանի բնակավայրերը: Նրանց ջանքերի շնորհիվ Ստեկլյաննի և Լեսոզավոդ բնակավայրերի բնակիչներն այժմ կարող են առանց վախի ու տագնապի նայել շրջակա անտառին: Ունիկալ տեխնիկան, որով աշխատում էին հայ հրշեջները` 10 տոննա ջուր հրդեհի վայր հասցնելու ընդունակ ավտոմեքենաներն անփոխարինելի էին անտառային հրդեհների շիջման ժամանակ»,- ասվում է հաղորդագրության մեջ, հաղորդում է Վրեմյա. Նովոստին:
