«Ճամփորդություն առանց սահմանների» նախագծի իրականացման համար կծախսվի 350 հազար դոլար

30 օգոստոսի 2010 - 15:17 AMT

PanARMENIAN.Net - TWB ընկերությունը, որը լույս է ընծայում National Geographic Traveler (Armenia) ամսագիրը, կազմակերպել է 6 փուլերից կազմված մի նախագիծ, որը կոչվում է «Ճամփորդություն առանց սահմանների»` նվիրված Հայաստանի հարավում Տաթևի ճոպանուղու բացմանը: Այդ մասին Երևանում լրագրողներին է հայտարարել նախագծի կազմակերպիչ, National Geographic Traveler (Armenia) հանդեսի գլխավոր խմբագիր Արեգ Նազարյանը:

Ըստ նրա, նախագիծը ներառում է ջիպերով միջազգային ռալլի Ռուսաստան-Ղազախստան-Թուրքմենստան-Իրան-Թուրքիա-Վրաստան-Հայաստան երթուղով, առագաստանավերի միջազգային ռեգատա Սևանա լճում, ձիարշավ Մեծ մետաքսի ճանապարհի հայաստանյան հատվածով: Ավտոռալլիի հետ կապված միակ խնդիրն, ըստ կազմակերպիչների, կարող է լինել ռուսաստանցիների մուտքի հարցը Իրան կամ Վրաստան:

Բացի այդ, նախագծի շրջանակներում տեղի կունենա «Music without borders» ռոք և բայք փառատոն բաց երկնքի տակ, որը կմեկնարկի Ախթալայում, հետո կշարունակվի Սևանում և կավատրվի Ջերմուկի օդանավակայանում:

«Ճամփորդություն առանց սահմանների» նախագծի շրջանակներում տեղի կունենա միջազգային կոնֆերանս «National Geographic Traveler»-ի գլխավոր գրասենյակի և ամսագրի բոլոր 14 հրատարակությունների ներկայացուցիչների մասնակցությամբ:

Ըստ Արեգ Նազարյանի, «Ճամփորդություն առանց սահմանների» նախագծի արժեքը 350 հազար դոլար է: Հայաստանի կառավարությունը հատկացրել է 27,6 մլն դրամ «National Geographic Traveler» կոնֆերանսի կազմակերպման համար, իսկ OSCE-ին ֆինանսական աջակցություն կցուցաբերի ռոք-փառատոնին:

Նախագիծն արժանացել է ՀՀ նախագահ Սերժ Սարգսյանի, վարչապետ Տիգրան Սարգսյանի հավանությանն, այն իրականացվում է էկոնոմիկայի, արտաքին գործերի, սփյուռքի նախարարությունների, Հայաստանի ազգային մրցունակության հիմնադրամի, OSCE-ի և տարբեր երկրների դեսպանատների աջակցությամբ: