ՀՀ տարածքային կառավարման նախարարին կից կոլեգիայի այսօրվա նիստում ՏԿՆ միգրացիոն պետական ծառայության պետ Գագիկ Եգանյանը ներկայացրեց Հայաստանի Հանրապետության միգրացիայի պետական կարգավորման քաղաքականության հայեցակարգի նախագիծը: Փաստաթուղթն անդրադառնում է ՀՀ միգրացիոն իրավիճակին, միգրացիայի պետական կարգավորման քաղաքականության նպատակին ու սկզբունքներին, միգրացիայի պետական կարգավորման քաղաքականության հիմնախնդիրներին, դրանց լուծման հիմնորոշ ուղղություններին: ՀՀ կառավարության գործունեության ծրագրի համաձայն` փաստաթուղթը դեկտեմբերին պետք է ներկայացվի կառավարություն: Գ. Եգանյանը տեղեկացրեց նաև, որ նախագիծը փորձաքննության կենթարկվի միգրացիայի ոլորտում Եվրամիության ընդունված չափորոշիչներին համապատասխանության տեսակետից: Այս նպատակով կհրավիրվի միջազգային փորձագետ` Եվրամիության TAIEX ծրագրի շրջանակում:
Փաստաթուղթն ընդունվեց ի գիտություն և որոշվեց ուղարկել շահագրգիռ կազմակերպություններին` առաջարկություններ ստանալու համար:
ՀՀ ՏԿՆ աշխատակազմի տեղական ինքնակառավարման վարչության պետ Աշոտ Գիլոյանը ներկայացրեց ՀՀ բազմաբնակարանային ֆոնդի կառավարման և շահագործման ոլորտի բարեփոխումների 5-ամյա ծրագրի մշակման նպատակով նախատեսվող աշխատանքները:
Բարեփոխումների ծրագրի մշակման նպատակով ՀՀ վարչապետի որոշմամբ ստեղծվել է միջգերատեսչական աշխատանքային խումբ: Նախատեսվում է ծրագրի նախագիծը ՀՀ կառավարության քննարկմանը ներկայացնել 6 ամիս հետո: Բարեփոխումների ծրագրի մշակման համար աշխատանքային խումբը կհիմնվի արդեն առկա մի շարք փաստաթղթերի վրա, այդ թվում` ՀԲ-ի անկախ փորձագետի կողմից ՀՀ կառավարությանը ներկայացված «Հայաստան. Բազմաբնակարանային բնակելի ֆոնդի վերանորոգումը և պաշտպանությունը» առաջարկությունների փաթեթի վրա:
Նշվեց, որ փոխվարչապետի ղեկավարած աշխատանքային խումբը պատրաստ է քննարկել ցանկացած իրատեսական առաջարկություն, հաղորդում է նախարարության հասարակայնության հետ կապերի բաժինը:
