Հայտնի օպերային երգչուհի, մեցցո-սոպրանո Վարդուհի Խաչատրյանի «Օպերային դիմակներ» համերգային ծրագիրն այսօր կբացի IV միջազգային երաժշտական «Վերադարձի» փառատոնը Երևանում:
«Մենք արդեն 2 տարի բանակցություններ էինք վարում Վարդուհի Խաչատրյանի հետ, որպեսզի նա ելույթ ունենա Երևանում, և վերջապես, մեզ հաջողվեց հասնել մեր նպատակին»,- այսօր Երևանում կայացած մամլո ասուլիսում նշել է «Արվեստների պատկերասրահ» մշակութային հիմնադրամի ղեկավար և «Վերադարձի» փառատոնի հիմնադիր Մարիամ Շահինյանը: Նա ընդգծել է նաև, որ փառատոնը հավատարիմ է մնում իր գլխավոր սկզբունքին. այն օգնում է վերամիավորվել արտասահմանյան և հայաստանցի հայ երաժիշտներին: «Դրա օրինակը Շվեյցարիան ներկայացնող Վարդուհի Խաչատրյանի այսօրվա դուետն է Հայաստանը ներկայացնող դաշնակահար Աննա Մանդալյանի հետ»,- նշել է Մարիամ Շահինյանը:
Փառատոնի շրջանակներում Երևանում, Գյումրիում և Վանաձորում ելույթ կունենան երաժշտական համույթներ Գերմանիայից, Շվեյցարիայից, Ռուսաստանից և Իսրայելից:
