Այսօր մեկնարկել է «Մասնագիտական կրթության որակի ապահովման առկա խնդիրները և զարգացման հեռանկարները ՀՀ-ում» խորագրով երկօրյա համաժողովը, որը կազմակերպել է «Մասնագիտական կրթության որակի ապահովման ազգային կենտրոն» հիմնադրամը (ՈԱԱԿ):
Համաժողովի մեկնարկին մասնակցել են բուհերի, նախանական ու միջին մասնագիտական ուսումնական հաստատությունների ղեկավարներ, դասախոսներ և ուսանողներ, ինչպես նաև գործարարներ, կրթության, գիտության ու տնտեսության ոլորտի գերատեսչական պատասխանատուներ` շուրջ 300 մասնակից։
ՀՀ վարչապետի անունից համաժողովի մասնակիցներին ողջունել է ՀՀ կրթության և գիտության նախարար Արմեն Աշոտյանը: Նախարարն ընդգծել է, որ ՀՀ կառավարությունը կենսական է համարում մասնագիտական կրթության համակարգում որակի ապահովման ժամանակակից մեխանիզմների ներդրման և հստակեցման հարցը: Կրթության որակի ապահովման առումով նախարարն ընդգծել է երեք հիմնական մոտեցում, այն է` տնտեսության, հասարակության և անձի ակնկալիքները կրթության որակից: Նախարարն ընգծել է, որ ժամանակն է մշակել «կրթության որակի հայաստանյան մոդելը», այն է` լսել շահագրգիռ բոլոր կարծիքները և դրանք համադրել միջազգային փորձի և առկա հնարավորությունների հետ:
Համաժողովի ընթացքում կքննարկվեն մեր երկրում մասնագիտական կրթության որակի ապահովման ազգային համակարգի նոր մոտեցումները, ոլորտը կանոնակարգող մի շարք փաստաթղթերի նախագծեր, ինչպես` մասնագիտական կրթության որակի ապահովման ՈԱԱԿ չափանիշներն ու չափորոշիչները:
Կրթության որակի ապահովման ազգային համակարգի նոր մոտեցումները մշակվել են որակի ապահովման եվրոպական չափանիշների և չափորոշիչների հիման վրա և ուղղված են նաև միջազգային ասպարեզում մեր երկրի կրթության որակի համընթեռնելիության և ճանաչելիության ապահովմանը, հաղորդում է ՀՀ ԿԳՆ մամլո ծառայությունը:
