ՀՀ էկոնոմիկայի նախարարությունը ձեռնամուխ է եղել որակի հսկողության համակարգի բարեփոխմանը, և արդեն 1-2 տարի հետո տեղական արտադրողները խնդիրներ չեն ունենա արտահանման հետ: Այդ մասին սեպտեմբերի 29-ին լրագրողներին հայտնել է ՀՀ էկոնոմիկայի նախարար Ներսես Երիցյանը սննդի արդյունաբերության առաջատար «Գրանդ քենդի» ընկերություն կատարած այցի ժամանակ:
Նրա խոսքերով, այսօր Հայաստանի սննդարդյունաբերության ոլորտում արտահանման ծավալները մեծ չեն, սակայն աճի արձանագրվող տեմպերը գերազանցում են 50-60 տոկոս ցուցանիշը: Մասնավորապես, Հայաստանն ամեն տարի ներկրում է շոկոլադ 40 մլն դոլար արժողությամբ, իսկ դա նշանակում է, որ այս շուկայում պոտենցիալը մեծ է, անհրաժեշտ է միայն ապահովել համապատասխան տեսականիով և որակով:
«Կան մի քանի ոչ մեծ ընկերություններ, որոնք տեղ են գտել արտասահմանյան շուկայում և կառավարության աջակցության կարիքն ունեն»,- ասել է նա և հավելել, որ արտահանման կազմակերպումը պահանջում է հատուկ գիտելիքներ, որոնք, ցավոք սրտի, բացակայում են տեղական արտադրողների մոտ: «Արտաքին շուկայի համար արտադրելը թանկ հաճույք է»,- ասել է նախարարը:
