Հայաստանի կողմից Ադրբեջանի անկախությունը նրա` դե ֆակտո գոյություն ունեցող սահմանների շրջանակում ճանաչելը շատ ճիշտ առաջարկ է: Նման առաջարկ կատարվել է դեռևս 1991 թվականին, այն ենթադրում էր, որ Հայաստանը միանգամից կճանաչի և’ ԼՂՀ, և’ Ադրբեջանի անկախությունը: Այդ մասին ՀՀ խորհրդարանում հոկտեմբերի 5-ին Հայաստանի կողմից ԼՂՀ անկախության ճանաչման մասին «Ժառանգության» օրինագծի քննարկման ժամանակ հայտնել է Հայաստանի փոխարտգործնախարար Շավարշ Քոչարյանը:
Անդրադառնալով այն հարցին, թե արդյոք հայկական կողմի շահերին կհակասի, եթե բոլոր խորհրդարանական խմբակցությունները «ԼՂՀ անկախության ճանաչման մասին» օրինագիծը խորհրդարանի մեծ օրակարգում ներառելու մասին համատեղ փաստաթուղթ ստորագրեն, Շավարշ Քոչարյանը նկատել է, որ ԼՂՀ անկախության ճանաչումը միշտ Հայաստանի ներքին քաղաքականության օրակարգում է: «Սակայն Արցախը պետք է դե-յուրե ճանաչել այն ժամանակ, երբ դա առավելապես արդյունավետ լինի»,- ընդգծել է նա:
