Միջազգային կառույցները պետք է համապատասխան գնահատական տան Բաքվում հայ պատանդի սպանությանը

PanARMENIAN.Net - «Մենք դատապարտում ենք Ադրբեջանում հայ պատանդի սպանությունը: Այն, որ հայ պատանդին Բաքվում անմարդկային պայմաններում են պահել, վառ օրինակն է այն բանի, որ Ադրբեջանը խախտում է միջազգային նորմերը»,- PanARMENIAN.Net ի թղթակցի հետ զրույցում հայտնել է Հայաստանի Հանրապետական կուսակցության (ՀՀԿ) խմբակցության պատգամավոր Գագիկ Մելիքյանը:

«Ադրբեջանցիները սպանում են անգամ պատանդին»,- ասել է Մելիքյանը` ավելացնելով, որ դա ադրբեջանական կողմի դիվերսիոն գործողությունների շղթայի շարունակությունն է: «Բոլոր միջազգային կառույցները պետք է համապատասխան գնահատական տան այդ միջադեպին»,- նկատել է նա:

Ադրբեջանի պաշտպանության նախարարությունն ու ռազմական դատախազությունը համատեղ հայտարարություն են տարածել հայ գերիՄանվել Սարիբեկյանի«ինքնասպանության» մասին: Ինչպես հաղորդում է ադրբեջանական 1news.az գործակալությունը, Մանվել Սարիբեկյանն իբր ինքնասպան է եղել հոկտեմբերի լույս 5-ի գիշերը:

Պատահարի վայրի զննության արդյունքում ռազմական դատախազության աշխատակիցները պարզել են, որ Սարիբեկյանը «կախվել է իր վերնաշապիկից ու սավանից հյուսված պարանի օգնությամբ»: Սարիբեկյանի պարանոցին հայտնաբերվել է խեղդամահ եղածների համար բնորոշ սպի: Դատաբժշկական փորձաքննությունը բռնության ոչ մի հետք «չի հայտնաբերել» Սարիբեկյանի մարմնի վրա:

Մանվել Սարիբեկյանը հովիվ էր, նա գերեվարվել է ադրբեջանական կողմից սպետմեբրի 11-ին, որտեղ նրան «դիվերսանտ» հայտարարեցին: Ըստ ՀՀ պաշտպանության նախարարության պաշտոնական հայտարարության, Սարիբեկյանն ավարտել է զինվորական ծառայությունը ՀՀ ԶՈւ շարքերում 2010 թվականի մայիսին և ոչ մի առնչություն չունի հատուկ ծառայությունների հետ: Գերեվարվելուց մի քանի օր անց ինտերնետում տեղադրվել էր Սարիբեկյանի «հարցազրույցի» տեսահոլովակը: Մասնագիտական փորձաքննությունից հետո, ակնհայտ դարձավ, որ այն նկարահանվել է հոգեբանական ու ֆիզիկական ճնշման ներքո՝ հատուկ միջոցների կիրառմամբ: