8 հոկտեմբերի 2010 - 21:47 AMT
Ամենայն Հայոց Կաթողիկոսն ընդունեց ապակենտրոնացված համագործակցության հայ-ֆրանսիական համաժողովի մասնակիցներին

Հոկտեմբերի 8-ին Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց ապակենտրոնացված համագործակցության հայ-ֆրանսիական համաժողովի մասնակիցներին:

Նորին Սրբությունը գոհունակություն հայտնեց հայ-ֆրանսիական կապերի շարունակական զարգացման համար, որի շարժիչը երկու ժողովուրդների բարեկամության ոգին է: Վեհափառ Հայրապետը մեծապես կարևորեց Հայաստանի և Ֆրանսիայի քույր քաղաքների միջև համագործակցությունը, որ պտղաբերում է նորանոր իրագործումներով:

Ամենայն Հայոց Կաթողիկոսն իր խոսքում նաև երախտագիտություն հայտնեց Ֆրանսիայի ժողովրդին և իշխանություններին հայ ժողովրդին ցուցաբերած զորակցության համար, մասնավորապես, Ցեղասպանության ճանաչման ու դատապարտման գործում, ինչը կարևոր է թե' հայ ժողովրդի նկատմամբ արդարության հաստատման և թե' հետագա նման ողբերգությունների կանխարգելման համար:

Հանդիպմանը անդրադարձ կատարվեց նաև Լեռնային Ղարաբաղի հակամարտության խաղաղ կարգավորմանն ուղղված ջանքերին, ինչպես նաև Հայ Եկեղեցու գործունեությանը և ներգրավվածությանը միջկրոնական երկխոսության մեջ, հաղորդում է Մայր Աթոռ Սուրբ Էջմիածնի մամլո դիվանը: