«Անտառահատման անօրինական խնդիրը ծառացած է բոլոր երկրների առաջ, տարբերությունը միայն դրա ծավալների մեջ է»,- հոկտեմբերի 18-ին մամլո ասուլիսում ասել է «Հայանտառ» ՊՈԱԿ-ի տնօրեն Սուրեն Մաթևոսյանը: Նրա խոսքերով, Հայաստանում անտառները կազմում են երկրի ողջ տարածքի 11 տոկոսը: «Հայանտառի տրամադրության տակ գտնվում է անտառային ֆոնդի 350 հազար հա-ն»,- նշել է Մաթևոսյանը:

Սակայն, բնապահպանության նախկին նախարար, բնապահպան Կարինե Դանիելյանի խոսքերով, անտառային զանգվածները տարբեր տվյալներով կազմում են Հայաստանի տարածքի 70 տոկոսը: Նրա խոսքերով, տարածված կարծիքն այն մասին, որ անտառների մեծ մասը հատվել է շրջափակման տարիներին, սխալ է: «90-ականներին Հայաստանում հատվել է տարեկան 500 հազար խմ անտառ: 2000-ին այդ թիվը միջազգային կազմակերպությունների պաշտոնական տվյալներով կազմել է 800 հազար խմ, իսկ հետագա տարիներին` 400 հազար»,- նշել է Կարինե Դանիելյանը: Այդ երևույթը բացատրվում է նրանով, որ եթե շրջափակման տարիներին անտառները հատում էր բնակչությունը ծառերը որպես վառելիք օգտագործելու համար, ապա հիմա անտառահատումը կատարվում է արդյունաբերական մասշտաբներով:

Սուրեն Մաթևոսյանը նշել է, որ 2005-ից ՀՀ կառավարությունը միջոցներ է ձեռնարկել անօրինական անտառահատման դեմ, ուստի հիմա անտառահատումը Հայաստանում անհնար է: