Հայ գործարարները չեն կարողանում հասկանալ չինացիներին, որոնք 200 տարով առաջ են մտածում, քանի որ չեն կարողանում հավատալ երկարաժամկետ նախագծերի իրագործման հստակությանը, գտնում է «Տռոյկա Դիալոգ» Խմբի գործադիր տնօրեն Գոռ Նահապետյանը: «Բոլոր այն ոլորտները, որտեղ հայ ձեռնարկատերերը հաջողության են հասել, ոչ երկարաժամկետ բիզնեսներ են, շատ քիչ են այն հայերը, որոնք երկարաժամկետ նախագծեր են ձեռնարկում»,- ասել է նա` ելույթ ունենալով հոկտեմբերի 17-ից 19-ը Երևանում ընթացող Բանկատերերի և ֆինանսիստների առաջին համահայկական խորհրդաժողովում, որը կազմակերպվել է ՀՀ սփյուռքի նախարարության կողմից` Հայաստանի Կենտրոնական բանկի ու Բանկերի միության հետ համատեղ:

Նրա խոսքով, Հայաստանում չափազանց զարգացած է կաշառակերությունը, ինչի պատճառով էլ ձեռնարկատերերը դժվարությամբ են հավատում, որ մարդիկ կարող են երկարաժամկետ նախագծեր իրականացնել ազնիվ, հիմնվելով ամբիցիաների վրա: Նման ամբիցիոզ նախագիծ է հանդիսանում «Տաթևի վերածնության» նախագիծը, որի գործարկումը սկսվեց հոկտեմբերի 16-ին «Տռոյկա Դիալոգի» աջակցությամբ: Այդ կապակցությամբ Գոռ Նահապետյանը հաղորդել է, որ «Տռոյկա Դիալոգը» մտադիր է մի խումբ գործարարների համար «Բլոուշեն ռազմավարության» հիմքեր անցկացնել, որը թույլ է տալիս միևնույն տարածքում ու միևնույն պայմաններով հետաքրքիր նախագծեր իրականացնել:

Անդրադառնալով Հայաստանի բանկային համակարգի զարգացմանն ու Համահայկական բանկի ստեղծմանը` Գոռ Նահապետյանը նշել է, որ իր հաճախորդների բազան սահմանափակվում է 1 մլն-ով: «Ոչ մի հայկական բանկ 20 տարվա ժամանակահատվածում Ռուսաստանում իմ բնակության ընթացքում ոչ մի ծառայություն չի առաջարկել: Եկեք Հայաստանն ավելի մեծ դարձնենք, դա էլ կլինի մեր հաճախորդների բազան: Համահայկական բանկը ոչ միայն գաղափար է, որը կապում է հայերին տեղեկատվական դաշտում, այլև ֆինանսական գործիք, որը կարող է օգնել այստեղ ծնունդ առնող նոր բիզնեսին ճեղքում կատարել»,- ընդգծել է «Տռոյկա Դիալոգի» գործադիր տնօրենը: