«Ինեկոբանկ» ՓԲԸ-ի վարկային պորտֆելը առաջին 9 ամիսների արդյունքում ավելացել է 7,5 մլրդ դրամով, PanARMENIAN.Net-ի թղթակցի հետ զրույցում հայտարարել է բանկի գործադիր տնօրեն Ավետիս Բալոյանը: «Այսօրվա դրությամբ վարկային պորտֆելը կազմում է 34 մլրդ դրամ, իսկ տարեվերջին այն կհասնի 37 մլրդ դրամի»,-ասել է նա:
Ընդ որում, նա նշել է, որ վարկավորման գործընթացը բավական ակտիվացել է վերջին ժամանակներս, և հույս կա, որ «Ինեկոբանկը» նույնիսկ կգերակատարի իր նախատեսած ցուցանիշը:
Անդրադառնալով վարկային պորտֆելի կառուցվածքին, գործադիր տնօրենն ասել է, որ 50 տոկոսը բաժին է ընկնում փոքր ու միջին ձեռնարկատիրությանը:
Հոկտեմբերի 20-ին Երևանում «Ինեկոբանկ» ՓԲԸ-ն և ՎԶԵԲ-ը 17 մլն դոլար ընդհանուր գումարի վարկային համաձայնագիր են կնքել, որոնցից 11 մլն դոլարը կհատկացվի ՓՄՁ-ների զարգացմանը, իսկ մյուս մասը՝ խոշոր բիզնեսի ֆինանսավորմանը: «Ինեկոբանկի» կողմից համաձայանգիրը ստորագրել է Ավետիս Բալոյանը, իսկ ՎԶԵԲ-ի կողմից, ՎԶԵԲ-ի գլխավոր բանկիր Ելենա Տոննոն: