2010թ. երրորդ եռամսյակում էլեկտրոնային վճարումների ծավալը ավելացել է 6 տոկոսով

PanARMENIAN.Net - 2010թ. երրորդ եռամսյակում ՀՀ կենտրոնական բանկի վճարային համակարգերով կատարված վճարումների գերակշիռ մասը իրականացվել է էլեկտրոնային վճարումների համակարգի միջոցով: Ինչպես հայտնում է ՀՀ ԿԲ մամլո ծառայությունը, համակարգի մասնակիցների էլեկտրոնային վճարումները (առանց բորսայական գործառնություններ իրականացնելու հետ կապված փոխանցումների) միջին հաշվով կազմել են ընդհանուր վճարումների ծավալի 56%-ը, քանակի 95%-ը: Նախորդ տարվա նույն ժամանակահատվածի համեմատությամբ էլեկտրոնային վճարումների ծավալը ավելացել է 6%-ով (118 մլրդ դրամով), իսկ քանակը ավելացել է`21%-ով (142010-ով): Առևտրային բանկերի կողմից էլեկտրոնային վճարումների համակարգով (առանց բորսայական գործառնություններ իրականացնելու հետ կապված փոխանցումների) կատարված վճարումները կազմել են վերջիններիս վճարումների ծավալի մոտ 55%-ը (2009թ. երրորդ եռամսյակի համեմատ ավելացել են 45%-ով), իսկ քանակի` մոտ 99.6%-ը:

Էլեկտրոնային վճարումների համակարգով իրականացված դրամական փոխանցումների միջին օրական քանակը 2009թ. երրորդ եռամսյակի համեմատ ավելացել է 2219-ով` կազմելով 12832, իսկ ծավալը ավելացել է 2 մլրդ դրամով` կազմելով 35 մլրդ դրամ: Բորսայական գործառնությունների իրականացման նպատակով հաշվետու ժամանակահատվածում կատարված փոխանցումների միջին օրական ծավալը կազմել է մոտ 146 մլրդ դրամ (ավելացել է 11 մլրդ դրամով):

Էլեկտրոնային վճարումների համակարգում մեկ էլեկտրոնային փոխանցման միջին ծավալը,առանց բորսայական գործառնությունների իրականացման հետ կապված փոխանցումների, նախորդ տարվա նույն ժամանակահատվածի համեմատ գրեթե պահպանվել է նույն մակարդակի վրա, և կազմել է 2.7 մլն դրամ: Էլեկտրոնային վճարումների համակարգով առևտրային բանկերի կողմից բորսայական գործառնությունների իրականացման հետ կապված փոխանցումների միջին ծավալը կազմել 1.6 մլրդ դրամ: