ՀՀ ոստիկանության հատուկ նշանակության ջոկատի վետերանների երիտասարդական թևը Երևանում խաղաղ երթ է անցկացրել «Պայքարենք միասին օտարածին այլասերվածության դեմ» կարգախոսով, որպես բողոքի նշան ընդդեմ «էմո» ենթամշակութային շարժման աղավաղված գաղափարախոսության:
«Մենք հանդես ենք գալիս, ոչ թե «էմո» շարժման դեմ որպես այդպիսին, քանի որ դա զգացմունքային ռոք-արվեստ է, այլ մեր երկրում նրա աղավաղված ընկալման դեմ: «Էմոները» ուղղակի ձգտում են ապրել ազատ ու անկախ և ոչ ոքի չեն վնասում»,-դեկտեմբերի 2-ին տեղի ունեցած մամլո ասուլիսում հայտարարել է երիտասարդական թևի նախագահ Հայարփի Ալավերդյանը:
Ըստ նրա «Էմո» աղավաղված գաղափարախոսությունը շատ վատ է անդրադառնում դեռահասների վրա, իսկ դպրոցներում հարցը բավականին սուր է դրված: «Մենք տեղեկություններ ունենք, որ նրանց դասագրքերում ածելիներին են գտնում: Մեր ակցիայով մենք ցանկանքւմ ենք կանխել այդ գաղափարախոսության տարածումը, որը սուիցիդալ գործողությունների է հորդորում: Մենք նաև բուկլետներ կբաժանենք անցորդներին»,-ասել է Ալավերդյանը:
Նա հավելել է, որ շարժումը թափանցել է Հայաստան 2007թ. և բավական արագ տարածվել: «Ուստի, մենք այն եզրակացության ենք եկել, որ այս շարժումը հովանավորվում և ֆինանսավորվում է որոշ անձանց կողմից»,-ասել է Ալավերդյանը:
