Հայ գործարարները հակված չեն հաճոյանալու իրենց սպառողներին ամանորյա տոների նախաշեմին

PanARMENIAN.Net - Գաղտնիք չէ, որ ամանորյա տոների նախաշեմին գործարարները մտածում են լրացուցիչ շահույթ ստանալու մասին, մասնավորապես, այդ միտումը նկատվում է սպառողական շուկայում, բացառություն են կազմում շինարարությունը և տեխնիկան, որտեղ գները նախատոնական շրջանում նվազում են: Այդ մասին դեկտեմբերի 7-ին Երևանում մամլո ասուլիսում ասել է Հայաստանի Սպառողների ազգային ասոցիացիայի նախագահ Մելիտա Հակոբյանը: «Երկրի իշխանությունները պետք է գների զսպման քաղաքականություն մշակեն, ինչպես դա արվում է աշխարհի քաղաքակիրթ երկրներում»,- հայտարարել է նա:

Նրա խոսքերով, նախատոնական քաղաքականությունը քաղաքակիրթ երկրներում ուղղված է սպառողներին սիրաշահելուն, իսկ Հայաստանում նկատվում է հակառակ իրավիճակը: «Տնտեսվարող սուբյեկտները բարձրացնում են գները, որոնց 80 տոկոսը ներկրողներ են, արդյունքում, սպառողը հայտնվում է անելանելի վիճակում»,- ասել է Հակոբյանը: Դրա հետ կապված` նա կոչ է արել համապատասխան մարմիններին բարձրացնել իրենց օպերատիվությունը և ուշադիր հետևել այդ շրջանում իրադարձությունների զարգացմանը: