Հայաստանի նախագահը մեծապես կարևորում է ընդդիմության ինստիտուտի առկայությունը: Ըստ նրա, ցանկացած երկրի համար կարևոր է կառուցողական ընդդիմություն ունենալ: Այդ մասին Երևանում կայացած մամլո ասուլիսում հայտարարել է Հայաստանի Հանրապետական կուսակցության քարտուղար Էդուարդ Շարմազանովը: «Գտնում եմ, որ մենք ունենք նման ընդդիմություն: Ես հեռու եմ այն կարծիքից, թե իշխանությունները լավն են, իսկ ընդդիմությունը վատն է: Այն, որ կողմերը տարբեր կարծիքներ ունեն քաղաքական հարցերում, չի նշանակում, թե նրանք թշնամիներ են»,-ասել է ՀՀԿ անդամը: Նա նշել է, որ ընդդիմությունն ու կոալիցիան պետք է քաղաքակիրթ պայքար մղեն:
Անդրադառնալով արտահերթ ընտրությունների հնարավորությանը, ինչի մասին բազմիցս է հայտարարել Հայ ազգային կոնգրեսը, Շարմազանովն ասել է. «Նույնիսկ ՀԱԿ-ն ինքն արդեն չի հավատում արտահերթ ընտրությունների հնարավորությանը, ինչպես կարող են մյուսները հավատալ»: Ըստ նրա, ՀԱԿ-ի առաջնորդ Լևոն Տեր-Պետրոսյանի նախընտրական շտաբի պետ, ԱԳ նախկին նախարար Ալեքսանդր Արզումանյանը բազմիցս է հայտարարել, որ չի հավատում արտահերթ ընտրությունների հնարավորությանը: «Եթե մենք հավատայինք ընդդիմությանը, ապա արդեն 6 նախագահական ու 11 խորհրդարանական ընտրություններ պետք է տեղի ունենային»,-ասել է նա:
