Ադրբեջանի Միլի Մեջլիսը (խորհրդարան) դժգոհություն է հայտնել Եվրախորհրդարանի պատգամավոր Տոմաշ Պորեբայի` Լեռնային Ղարաբաղ կատարած այցի կապակցությամբ:
Եվրախորհրդարանը ճանաչում է Ադրբեջանի տարածքային ամբողջականությունը, Լեռնային Ղարաբաղի հիմնախնդրի լուծման վերաբերյալ բանաձևեր է ընդունում, սակայն այդ խորհրդարանի անդամն առանց համապատասխան համաձայնեցման այց է կատարել Լեռնային Ղարաբաղ` դրանով իսկ խախտելով Ադրբեջանի տարածքային ամբողջականությունը, երեքշաբթի օրը կայացած նիստում նշել է խոսնակ Օքթայ Ասադովը:
Եվրախորհրդարանի ներկայացուցչի այցը Լեռնային Ղարաբաղ կարող է բացասաբար անդրադառնալ այդ կառույցի հետ Ադրբեջանի հարաբերությունների վրա, ասել է Ասադովը:
Այդ միջոցին «Ենի Ազերբայջան» իշխող կուսակցության գործադիր քարտուղար, Միլի Մեջլիսի պատգամավոր Ալի Ահմեդովը հանդես է եկել Լեռնային Ղարաբաղ այցելելու ռեժիմը կարգավորող օրենքի ընդունման մասին առաջարկով` բողոք հայտնելով Եվրախորհրդարանի ներկայացուցչի կողմից Լեռնային Ղարաբաղ կատարած այցի դեմ:
Պատգամավոր Գանիրա Փաշաևան իր հերթին սատարել է այդ գաղափարը` առաջարկելով օտար պետությունների` տարածքային ամբողջականությունը խախտող քաղաքացիներին «անցանկալի անձ» հայտարարել: