ՀՀ նախագահին կից վերահսկողական ծառայությունը լրջորեն կզբաղվի երկրում իրացվող դեղերի հարցով

PanARMENIAN.Net - ՀՀ նախագահին կից վերահսկողական ծառայությունը տվյալ պահին շարունակում է հսկողություն իրականացնել առողջապահության ոլորտում, և կառույցի ուշադրության կենտրոնում ներկրումն է և դեղերի իրացումը: Այդ մասին դեկտեմբերի 24-ին ամփոփիչ մամլո ասուլիսում հայտնել է ՀՀ նախագահին կից վերահսկողական ծառայության ղեկավար Հովհաննես Հովսեփյանը: Նրա խոսքերով, ստուգումների արդյունքում պարզվել է, որ իրականացվող պետծրագրի շրջանակներում ՀՀ առողջապահության նախարարությանը դեղեր մատակարարելու մրցույթում հաղթած ընկերությունը դեղատներում նույն դեղերը վաճառել է 30-40 տոկոսով ավելի էժան: «Ստուգումների արդյունքում նախագահի մոտ հրավիրելու է խորհրդակցություն, և նա արդեն տեղյակ է գոյություն ունեցող խնդիրներին»,- ասել է նա:

Հովհաննես Հովսեփյանը նաև հաղորդել է, որ որպես մարդասիրական օգնություն Հայաստան առաքվող դեղերը հաճախ չեն համապատասխանում որակի պահանջներին. լինում են ժամկետանց, չի նշվում արտադրողը: «Ներկրվում են դեղեր, որոնց պիտանելիության ժամկետն արդեն մոտենում է ավարտին և այնպիսի քանակությամբ, որ այդ շրջանում անհնար է դրանք իրացնել»,- ասել է նա: Վերահսկողական ծառայությունն արդեն բացահայտել է խախտումներ դեղատներին տրամադրվող լիցենզիաների մեջ: «2008-2009 թթ. ընթացքում մենք անցկացրել ենք ուսումնասիրություններ 96 դեղատներում, որի արդյունքում բացահայտվել է լիցենզիա տրամադրելու պայմանների 176 խախտում»,- ասել է նա և հավելել, որ ծառայությունը բազմիցս ստիպված է եղել ժամկետանց և չգրանցված դեղերը առգրավել դեղատներից:

Նա նաև հաղորդել է, որ հիվանդանոցներում և պոլիկլինիկաներում մեծ խնդիր կա, կապված նրա հետ, որ տրամադրվող դեղամիջոցները և պարագաները չեն հասնում հասցեատիրոջը: