2010-ին Հայաստանում արձանագրվել է բարձր գնաճ (11 ամիսների տվյալներով ավելի քան 8 տոկոս), որն անցյալ տարվա մակրոտնտեսական ցուցանիշների ֆոնի վրա զգալի մարտահրավեր է երկրի իշխանություններին: Այդ մասին դեկտեմբերի 28-ին Երևանում մամլո ասուլիսում ասել է ՀՀ ԱԺ ֆինանսավարկային և բյուջետային հարցերով մշտական խորհրդարանական հանձնաժողովի անդամ Գագիկ Մինասյանը:
Նրա խոսքերով, նման ցուցանիշն անբարենպաստ բնակլիմայական պայմանների արդյունք է, որոնք հանգեցրել են գյուղատնտեսության ոլորտում զգալի անկման, մասնավորապես, բուսաբուծության գծով: Մյուս ոլորտը, որը նշել է պատգամավորը, հացահատիկի համաշխարհային գների բարձրացումն է, ինչը չէր կարող չազդել Հայաստանի վրա, քանի որ երկրի քաղաքացիների սպառողական զամբյուղում հացամթերքը զգալի տեղ է գրավում: «Հայաստանի կառավարությունը զգալի քայլեր է ձեռնարկում հացահատիկից երկրի կախվածությունը նվազեցնելու համար: Արդեն մշակվել է սերմնաբուծության զարգացման հայեցակարգ, ինչը թույլ կտա ապահովել ներքին շուկայի պահանջները»,- հավելել է նա:
