Անցնելով ազգային դրամի լողացող փոխարժեքի քաղաքականությանը` Հայաստանի Կենտրոնական բանկը գործարքներ է կատարում արժույթի շուկայում, սակայն դրանք ուղղված են սեզոնային հոսքերի պատճառով դրամի փոխարժեքի տեղ գտած կտրուկ տատանումների մեղմացմանը և նպատակ չունեն փոխարժեքի որևէ մակարդակ ձևավորել: Այդ մասին փետրվարի 7-ին Երևանում կայացած մամլո ասուլիսում հայտնեց ՀՀ ԿԲ դրամա-վարկային քաղաքականության վարչության պետ Արթուր Ստեփանյանը:
«Երկրի դրամա-վարկային քաղաքականության խստացումն ու ապադոլարացման ուղղությամբ միջոցառումները, ինչպես նաև հարկա-բյուջետային քաղաքականությունը, բնականաբար, ավելի շատ ազդում են արժույթի շուկայում փոխարժեքների կայուն ձևավորմանը և հսկում են այն սադրիչ հարձակումները, որոնք կարող են տեղ գտնել արժույթի շուկայում»,- ասել է նա:
Բացի դրանից, Ստեփանյանի խոսքով, 2011-ին ԿԲ-ն կշարունակի ապադոլարացման ուղղությամբ միջոցառումները, և տարադրամով ներգրավված միջոցների արդեն 75% կպահուստավորվեն դրամով:
