Հարյուրավոր մարդիկ են հավաքվել Մատենադարանի մոտ, որտեղ Ժողովրդական կուսակցության առաջնորդ, ԱԼՄ հոլդինգի ղեկավար Տիգրան Կարապետյանը անց է կացնում իր «համագումարը բաց երկնքի տակ»: Ինչպես հայտնում է PanARMENIAN.Net-ի թղթակիցը իրադարձությունների վայրից, համագումարի մասնակիցները նամակ են ընդունել, որը մտադիր են հանձնել ՀՀ նախագահին: Ուղերձում, մասնավորապես, թվարկվում են կուսակցության հիմնական պահանջները՝ ազատ արձակել մարտի 1-ի գործով բոլոր կալանավորներին, բացառել Լեռնային Ղարաբաղի հանձնումը և արևմտյան խաղաղապահ ուժերի տեղակայումը տարածաշրջանում, ջավախահայության հարցը բարձրացնել պետական մակարդակի:

Ըստ Տիգրան Կարապետյանի, նա պայքարում է միայն իշխանությունների դեմ: «Մեր կուսակցությունը չի պատրաստվում որևէ կոալիցիայի մեջ մտնել: Ես գիտեմ, որ իմ դեմ են տրամադրված հայաստանյան ԶԼՄ-ները, մասնավորապես, «Հայկական ժամանակը»: Մենք ցանկանում էինք համագումարը անցկացնել մարզահամերգային համալիրում, սակայն, մեզանից պահանջեցին 10 մլն դրամ, նման գումար մենք չունեինք: Այժմ մենք համագումար ենք անցկացնում, իսկ փետրվարի 28-ին մեծ հանրահավաք կլինի: Եթե մինչ փետրվարի 28-ը իշխանությունները չկատարեն մեր պահանջները, մենք նրանց «կարմիր քարտ» ցույց կտանք, մենք նրանց «ոչ» կասենք»,-ասել է լրագրողներին Տիգրան Կարապետյանը:

Հանրահավաքի մասնակիցների մի մասը մնացել է Մատենադարանի մոտ, մյուսները շարժվել են դեպի նախագահի նստավայր՝ հանձնելու համար իրենց ուղերձը: