Ագրեսիվության աճը դեռահասների շրջանում սոցիալ-հոգեբանական արմատներ ունի, հայտարարում է հոգեբանը: Այդ մասին Երևանում կայացած մամլո ասուլիսում հայտարարել է «Գիտահետազոտական լաբորատորիա» հոգեբանական ծառայությունների կենտրոնի տնօրեն, հոգեբան Մարիամ Մեհրաբյանը: Ըստ նրա, ագրեսիվությունը դեռահասների շրջանում վտանգավոր է նրանով, որ ժամանակի հետ կարող է բնավորության գիծ դառնալ:
Մեհրաբյանը նշել է, որ ագրեսիվության ավելացմանը նպաստում են նաև որոշ հեռուստահաղորդումներ: Մասնագետը կոչ է արել ծնողներին մշտապես շփման մեջ լինել դեռահաս երեխաների հետ և օգնել նրանց հաղթահարել բարդ շրջանը:
Ըստ հոգեբանի, հետազոտությունները ցույց են տվել, որ 15-18 տարեկան հանցագործների մոտ նկատվում է մոր հետ հոգեբանական կապի խզում, ինչն իր հերթին պատճառ է հանդիսանում ագրեսիվության զարգացման համար:
