Միայն վերջին 10 ամսում Հայաստանում գրանցվել է դեռահասների ինքնասպանության 34 դեպք: Այդ մասին Երևանում կայացած մամլո ասուլիսում հայտարարել է «Քայքայիչ աղանդներից տուժածների օգնության կենտրոն» ՀԿ-ի ղեկավար Ալեքսանդր Ամարյանը: Ըստ նրա, տվյալները հրապարակել են իրավապահ մարմինները, որոնք հաճախ նույնիսկ չեն էլ փորձում բացահայտել դեռահասների ինքնասպանության պատճառները՝ ասելով թե պատճառը կենցաղային է: «Ցավոք, Հայաստանում չկան մասնագետներ, որոնք կարող են պարզել այն կոնկրետ պատճառները, որ հանգեցրել են դեռահասների մահվան:
Այդ առնչությամբ Ամարյանն անդրադարձել է ոչ ֆորմալ ենթամշակութային երիտասարդական շարժումներին, մասնավորապես էմոներին ու գոթերին: Ըստ մասնագետների, էմոներն այն դեռահասներն են, որ չեն կարողանում իրենց տեղը գտնել հասարակությունում: Դա հանգեցնում է նրան, որ նրանք հեռանում են ընտանիքից, ընկերներից, հասակակիցներից, երազում են ինչ-որ այլ աշխարհի մասին, որտեղ, ըստ իրենց պատկերացումների, նրանք կհայտնվեն՝ ինքնասպանություն կատարելով: «Մեզ մեղադրում են, թե մենք հետապնդումներ ենք հրահրում դեռահասների հանդեպ: Սակայն, մենք փորձում ենք ցույց տալ, որ նման խնդիր կա: Մենք պետք է նախանձախնդիր լինենք մեր երիտասարդ քաղաքացիների հոգեկան առողջության հարցում»,-ասել է Ամարյանը:
Ըստ նրա, այդ խնդրի լուծմանը պետք է մասնակցի ինչպես պետությունը, այնպես էր հանրությունը, ԶԼՄ-ները: «Հարկավոր է կանխարգելիչ աշխատանք կատարել: Այստեղ կարևոր է հոգեբանների, ծնողների դերը, որոնք պետք է մշտական կապի մեջ լինեն երեխաների հետ: Իսկ ԶԼՄ-ներին ես կոչ եմ անում օբյեկտիվ կերպով ներկայացնել խնդիրը»,-ասել է Ամարյանը:
