Համատիրությունների աշխատանքը պետք է կայանա համակարգային առումով` նշել է Երևանի քաղաքապետ Կարեն Կարապետյանը հերթական աշխատանքային խորհրդակցության ընթացքում, որտեղ ներկայացվել է 2010թ.-ին համատիրությունների աշխատանքային գործունեության վերաբերյալ տեղեկատվությունը, ինչպես նաև վարչական շրջանների և համատիրությունների համատեղ կազմած 2011թ. ծրագրերը: Քաղաքապետի համոզմամբ` անհրաժեշտ է մեխանիզմներ մշակել համեմատաբար հաջողված համատիրություններին աջակցելու նպատակով, ինչն իր հերթին խթան կհանդիսանա մյուսների համար. «Այսինքն` օգնենք կայացածին: Սա, համոզված եմ, ավելի արդյունավետ կլինի»,- ասել է քաղաքապետը:
Վարչական շրջանների ղեկավարներին առաջարկվել է պարբերաբար խորհրդակցություններ կազմակերպել համատիրությունների հետ, բացի այդ` նույնական և պարզ ձև մշակել համատիրությունների կողմից օրենքով սահմանված կարգով ներկայացվող հաշվետվությունների համար:
Անդրադառնալով Երևան քաղաքում կառուցապատողների կողմից շինարարության ժամկետների խախտումներին` Կարեն Կարապետյանը հանձնարարել է հետևողականորեն շարունակել աշխատանքը և օրենքով նախատեսված միջոցներ ձեռնարկել ժամկետային խախտումները բացառելու ուղղությամբ. ,- ընդգծել է քաղաքապետը:
Շեշտվել է, որ շինարարության ժամկետների պահպանումը լինելու է ոչ թե միանվագ ակցիա, այլ կրելու է ամենօրյա աշխատանքային բնույթ:
Գործարար միջավայրի բարելավման և ներդրումային միջոցների ներգրավման հետ կապված, Կարեն Կարապետյանն ընդգծել է իրավական ակտերն ու կանոնակարգերը բարեփոխելու և ընթացակարգերը պարզեցնելու անհրաժեշտությունը` հանձնարարելով ներկայացնել համապատասխան առաջարկություններ:
Քաղաքապետարանի և վարչական շրջանների հետ շփումը պետք է լինի թափանցիկ, իսկ քաղաքացիների, իրավաբանական անձանց դիմումների, գրությունների, ինչպես նաև քաղաքաշինական փաստաթղթերի տրամադրման ընթացակարգերը` պարզեցված, շեշտել է Կարեն Կարապետյանը:
Խոսելով մայրաքաղաքի վերելակային տնտեսության բարելավման անհրաժեշտության շուրջ` Երևանի քաղաքապետը հանձնարարել է մշակել հստակ հայեցակարգ, որն իրատեսորեն կդիտարկի վերելակային տնտեսության առկա խնդիրները: Ըստ այդմ, հանձնարարվել է հաշվարկել մայրաքաղաքում առկա վերելակների վերանորոգման և նորացման համար անհրաժեշտ միջոցները և համապատասխան առաջարկ ներկայացնել այդ նպատակով վարկային և ներդրումային ծրագրեր ներգրավելու համար, հաղորդում է Երևանի քաղաքապետարանի տեղեկատվության և հասարակայնության հետ կապերի վարչությունը:
