Վերջերս ստորագրված կոալիցիոն հայտարարությունը բևեռացրեց Հայաստանի քաղաքական դաշտը Հայաստանի Հանրապետական կուսակցության (ՀՀԿ) և ընդդիմադիր Հայ ազգային կոնգրեսի (ՀԱԿ) միջև: Այդ մասին Երևանում կայացած մամլո ասուլիսում հայտնել է քաղաքական և ընտրական տեխնոլոգիաների մասնագետ Արմեն Բադալյանը: «Քաղաքական դաշտը դարձել է երկկողմանի, սև-սպիտակ»,- նշել է նա և ավելացրել, որ այդ համաձայնագրի արդյունքում տուժել են «Բարգավաճ Հայաստան» կուսակցությունը (ԲՀԿ), ՀՅ Դաշնակցությունը, անուղղակիորեն ՀՀԿ-ն, իսկ շահել է միայն ՀԱԿ-ը:
Բադալյանի կարծիքով, այդ հայտարարությունը հանգեցրել է նրան, որ ԲՀԿ-ն դադարել է հասարակության մեջ ընկալվել որպես այլընտրանք ՀՀԿ-ին, ինչպես նաև հիասթափեցնում է կուսակցության ստորին և միջին օղակներին, որոնք այլ քաղաքական ուժերին կհակվեն:
Այս կարծիքին համամիտ չէ վերլուծաբան Անուշ Սեդրակյանը, որը ԲՀԿ-ն իշխանության կուսակցություն է համարում, հետևաբար ԲՀԿ-ն չէր կարող ՀՀԿ-ին այլընտրանք դառնալ:
Փետրվարի 17-ին Հայաստանի քաղաքական կոալիցիան` Հայաստանի Հանրապետական կուսակցությունը, «Բարգավաճ Հայաստան» և «Օրինաց երկիր» կուսակցությունները «Քաղաքական կոալիցիայի հայտարարություն» ստորագրեցին: Հայաստանի Հանրապետական կուսակցության կողմից հայտարարությունը ստորագրեց ՀՀ նախագահ, ՀՀԿ նախագահ Սերժ Սարգսյանը, «Բարգավաճ Հայաստանի» կողմից` կուսակցության նախագահ Գագիկ Ծառուկյանը, իսկ «Օրինաց երկրի» կողմից` կուսակցության նախագահ Արթուր Բաղդասարյանը:
