Մարտի 15-17-ը ՀՀ սփյուռքի նախարարության պատվիրակությունը աշխատանքային այցով մեկնեց Սանկտ Պետերբուրգ` մասնակցելու ՌԴ Հյուսիսարևմտյան դաշնային օկրուգի հայ համայնքների և հայկական կազմակերպությունների ներկայացուցիչների հետ հավաք-հանդիպմանը: Պատվիրակության կազմում են ՀՀ սփյուռքի նախարարի տեղակալ Ստեփան Պետրոսյանը և ԱՊՀ հայ համայնքների վարչության պետ Անդրանիկ Արշակյանը:
Հավաք-հանդիպման նպատակն է ներկայացնել հայկական Սփյուռքի նկատմամբ Հայաստանի Հանրապետության արդի քաղաքականության, ՀՀ սփյուռքի նախարարության ռազմավարական խնդիրները, վերհանել Հայաստանի և ՌԴ Հյուսիսարևմտյան դաշնային օկրուգի հայ համայնքների գործակցության հիմնախնդիրները, ամրապնդել գործակցության զարգացումը, ակտիվացնել ազգային ներուժի համախմբման, ինքնության պահպանման հարցում հայ համայնքների և հայկական կազմակերպությունների դերակատարությունը և մեծացնել վերջիններիս ներգրավվածությունը ՀՀ և ՌԴ միջպետական, տարածաշրջանային համագործակցության տարբեր ոլորտներում:
Այցի ընթացքում ՀՀ սփյուռքի նախարարության պատվիրակությունը առանձին հանդիպումներ կունենա ՌԴ Հյուսիսարևմտյան դաշնային օկրուգի հայ համայնքների ներկայացուցիչների հետ: