ԱՄՆ-ն արդեն շատ բան է արել ղարաբաղյան հակամարտության լուծման համար և ամեն ինչ անելու է Սոչիում հակամարտության կողմերի ձեռք բերած առաջընթացին աջակցելու համար: Այդ մասին հայտարարել է Ադրբեջանում ԱՄՆ դեսպան Մեթյու Բրայզան:
«Վաշինգտոնը լքելուց առաջ ես հնարավորություն եմ ունեցել քննարկել Մինսկի գործընթացը երկկողմանի հարաբերությունների համատեքստում նախագահ Օբամայի և պետքարտուղար Քլինթոնի հետ: Ես ականատես եմ եղել, որ Վաշինգտոնը ձգտում է անհրաժեշտ ամեն ինչ անել, որպեսզի օգնի կողմերին հասնել համաձայնության»,- ասել է Բաքվում ԱՄՆ դեսպանը: Նրա խոսքերով, ԱՄՆ-ն շահագրգռված է հակամարտության խաղաղ լուծման մեջ:
Բրայզայի խոսքերով, շատ կարևոր ձեռքբերում է Ադրբեջանի և Հայաստանի նախագահների հայտարարությունը, որը հաստատում է խաղաղ կարգավորմանը հավատարիմ լինելը և այն կետը, որ զորքերի շփման գծի բոլոր միջադեպերը պետք է հետաքննվեն ԵԱՀԿ կողմից: Բրայզայի կարծիքով, շատ կարևոր է նաև գերիների փոխանակության մասին ձեռք բերված պայմանավորվածությունը, որը տեղի է ունեցել մարտի 17-ին, հաղորդում է Trend-ը:
