Հայաստանի նախագահ Սերժ Սարգսյանն ու պաշտպանության նախարար Սեյրան Օհանյանը մեծ աջակցություն են ցուցաբերում 1827թ. Օշականի ճակատամարտում Էջմիածնի պաշտպանության ժամանակ զոհված ռուս զինվորների հիշատակին նվիրված հուշահամալիրի վերականգնման աշխատանքներին: Այդ մասին այսօր Օշական կատարած այցելության ընթացքում հայտարարել է վերակառուցման աշխատանքներն իրականացնող «Պատվի գործ» հայ-ռուսական բարեգործական կազմակերպության նախագահ Անդրանիկ Նիկողոսյանը:

Հիշեցնենք, որ համալիրի բարեկարգումն իրականացվում է Հայաստանում Ռուսաստանի դեսպան Վյաչեսլավ Կովալենկոյի նախաձեռնությամբ:

Նիկողոսյանը նշել է, որ Հայաստանի նախագահ Սերժ Սարգսյանը ջերմորեն է ընդունել այդ գաղափարը: «Հարկ է ընդգծել, որ Հայաստանը տարածաշրջանի միակ երկիրն է, որը վերականգնում է ռուսական հուշահամալիրներն ու եկեղեցիները: Մեր գլխավոր նպատակն է առավելագույնս աջակցել հայ և ռուս ժողովուրդների եղբայրական հարաբերությունների ամրապնդմանն ու խորացմանը»,- հայտարարել է նա, ասվում է «Օշականի հուշահամալիրի վերածնունդ» նախագծի մամուլի կենտրոնի հաղորդագրության մեջ:

Օշականի ճակատամարտը` 1826-1828թթ. Ռուս-պարսկական պատերազմի հերոսական էջերից է, որի արդյունքում Արեւելյան Հայաստանը, ազատագրվելով պարսկական լծից, միավորվել է Ռուսաստանին:

1827թ. օգոստոսի 17-ին պայքար էր ծավալվել գեներալ Աֆանասիյ Կրասովսկու ջոկատի եւ պարսից թագաժառանգ Աբբաս Միրզա արքայազնի բանակի միջեւ: Վերջինս, փորձելով կանխել ռուսական զորքի առաջխաղացումը, նախահարձակ եղավ Էջմիածնի ուղղությամբ, սակայն, ունենալով ուժերի ճնշող գերակայություն` 30000-ը 3500-ի դիմաց, մարտը տանուլ տվեց: 1833-1834թթ., ի հիշատակ Օշականի ճակատամարտում զոհված ռուս զինվորների, կառուցվել էր հուշահամալիր, որը մեր օրերում գտնվում էր անբարեկարգ ու լքյալ վիճակում:

Նշենք, որ սա «Պատվի գործ» կազմակերպության` երկու ժողովուրդների պատմական հիշողության պահպանմանն ուղղված երկրորդ խոշոր ծրագիրն է: Առաջինը` Գյումրիում գտնվող XIX դարի ռուս-թուրքական պատերազմների ժամանակ զոհված ռուսական բանակի սպաների Պատվո Բլուր գերեզմանատան վերականգնումն էր: Օշականի համալիրը մարմնավորում է ռուս զինվորների անձնուրաց հերոսությունը հայոց հողի վրա: Այն մեր ժողովուրդների դարավոր բարեկամության խորհրդանիշերից է: Վերականգնման բոլոր աշխատանքները կավարտվեն ապրիլին, իսկ բացումը տեղի կունենա նույն ամսին սպասվող հայ-ռուսական միջմարզային համաժողովի շրջանակներում: