Երևանի քաղաքապետ Կարեն Կարապետյանը հանդիպել է աշխատանքային այցով Երևանում գտնվող Կրասնոդարի քաղաքապետարանի պատվիրակությանը։ Շնորհակալություն հայտնելով ջերմ ընդունելության համար՝ Կրասնոդարի փոխքաղաքապետ Վիկտոր Բոնդարը Կարեն Կարապետյանին է ներկայացրել քաղաքային տնտեսության կառավարման ոլորտում վերջին տարիների իրենց փորձը։
Ինչպես հայտնում է քաղաքապետարանի մամլո ծառայությունը, Կարեն Կարապետյանն իր հերթին առանձնացրել է այն գերակայությունները, որոնք այսօր առաջնային են Երևանի համար և ընդգծել, որ քաղաքապետարանը բաց է և պատրաստ ցանկացած առաջավոր փորձի փոխանակման առումով. «Արդյունավետ կառավարումը հաջողության հասնելու գրավականն է»,– նշել է Երևանի քաղաքապետը։
Կողմերը կարծիքներ են փոխանակել երկկողմ հետաքրքրություն ներկայացնող մի շարք հարցերի շուրջ և պայմանավորվածություն են ձեռք բերել առաջիկայում կոնկրետ ծրագրեր քննարկել տարբեր ոլորտներում` համագործակցության և փորձի փոխանակման ուղղությամբ։