«Յունիբանկ» ՓԲԸ-ի ընդհանուր վարկային պորտֆելը 2010 թվականի դեկտեմբերի 31-ի դրությամբ կազմել է 212,6 մլն դոլար` վերջին երեք տարվա ընթացքում աճելով 119%-ով: Վարկային պորտֆելի աճը հիմնականում պայմանավորված է բիզնես վարկավորման ծավալների ընդլայնմամբ: Խոշոր բիզնեսին տրամադրված վարկերի պորտֆելը 2008թ.-ից մինչև 2010թ.-ը աճել է 109 %ով, իսկ փոքր և միջին բիզնեսի գծով` 131%-ով:

Աջակցությունը բիզնեսին «Յունիբանկի» վարկային քաղաքականության առաջնային ուղղություններից է: Ձեռնարկության գործունեության ոլորտից, ծավալներից և բիզնես ուղղության առանձնահատկություններից ելնելով` հաճախորդին առաջարկվում է համագործակցության ամենաարդյունավետ տարբերակը:

Ինչպես նշվում է բանկի մամլո ծառայության հաղորդագրության մեջ, «Յունիբանկն» առանձնակի ուշադրություն է դարձնում միջազգային չափանիշներին համապատասխան ռիսկ մենեջմենթի զարգացմանը: Շնորհիվ արդյունավետ վերահսկողության համակարգի, Բանկին հաջողվեց ապահովել ակտիվների բարձր որակ: Ըստ ԱրմԻնֆո գործակալության տվյալների, վարկային ներդրումների որակի ցուցանիշը, որը բնութագրում է Բանկի պորտֆելում առկա ժամկետանց վարկերի տեսակարար կշիռը, «Յունիբանկում» 2010թ.-ին կազմել է 0,01% (իդեալական ցուցանիշը 0%):