Տեղեկատվական անվտանգության մասնագետը հույս ունի, որ ԿՄ-ն կկարողանա դիմագրավել հաքերային հարձակումներին

PanARMENIAN.Net - LiveJournal բլոգային հարթակի վրա երեկ կատարված հաքերային հարձակման մասին այսօր LiveJournal-ի ադմինիստրատորներից Իլյա Դրոնովը ասել էր, որ ԿՄ-ի վրա պարբերական DDoS հաքերային հարձակումները նպատակ ունեն ԿՄ օգտագործողներին տանել, ցրել այլ սոցիալական բլոգային հարթակներ։

Տեղեկատվական անվտանգություն ոլորտի մասնագետ, բլոգեր Սամվել Մարտիրոսյանը ասաց PanARMENIAN.Net ի թղթակցին, որ իր կարծիքով LiveJournal-ի վրա շարունակվող հարձակումները կարող են լուրջ հետևանքներ ունենալ տեղեկատվական դաշտում. «Հաշվի առնելով, որ այսօր ԿՄ-ն ռուսալեզու ինտերնետի ամենամեծ և ամենաքաղաքականացված բլոգային հարթակն է, դա կարող է լուրջ հետևանքներ ունենալ տեղեկատվական դաշտում։ Իրականում հնարավոր է, որ հարձակումները հենց նման խնդիր են ուզում լուծել։ Եթե այս հարձակումները ևս մի քանի օր շարունակվեն, կարող է մեծաքանակ միգրացիա սկսվել ԿՄ-ից դեպի սոցիալական ցանցեր»։

Սամվել Մարտիրոսյանը LiveJournal-ն կորցնելու դեպքում կբացի իր անձնական կայքը. «Ես անձամբ էքսպորտ եմ անում իմ բլոգը երկու ուրիշ հարթակների վրա, հատուկ այսպիսի դեպքերի համար։ Եթե ստիպված լինեմ ԿՄ-ից հրաժարվել, երևի կբացեմ իմ անհատական կայքը, չեմ գնա այլ հարթակ»,- ասաց Սամվել Մարտիրոսյանը և ավելացրեց, որ հույս ունի, որ ԿՄ-ն կկարողանա դիմագրավել հաքերներին։