ԵԱՀԿ ՄԽ-ն անցել է Ղարաբաղի և Ադրբեջանի ԶՈՒ շփման գծի` նախօրոք ականազերծված հատվածով

PanARMENIAN.Net - Ապրիլի 13-ին` Լեռնային Ղարաբաղի Հանրապետության իշխանությունների հետ ձեռք բերված պայմանավորվածության համաձայն, ԵԱՀԿ առաքելությունը դիտարկում է անցկացրել Լեռնային Ղարաբաղի և Ադրբեջանի զինված ուժերի շփման գծում` Ակնա-Բարդա ճանապարհին` Ասկերանի ուղղությամբ:

ԼՂՀ պաշտպանության բանակի դիրքերից դիտարկման խումբը գլխավորում էր ԵԱՀԿ գործող նախագահի անձնական ներկայացուցիչ /ԳՆԱՆ/ Անջեյ Կասպշիկը: Դիտարկմանը մասնակցել են ղարբաղյան հակամարտության կարգավորման ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ռոբերտ Բրադտկեն (ԱՄՆ) և Բեռնար Ֆասիեն (Ֆրանսիա), ովքեր անցել են շփման գծի` նախօրոք ականազերծված հատվածով` սույն թվականի մարտի 8-ին տեղի ունեցած միջադեպի առնչությամբ օբյեկտիվ հետաքննություն անցկացնելու կապակցությամբ դեսպան Կասպշիկին աջակցելու նպատակով: ԼՂՀ կողմից դիտարկման խմբում ընդգրկված էին ԵԱՀԿ գրասենյակի համակարգող, փոխգնդապետ Իմրե Պալատինուսը/Հունգարիա/, ԳՆԱՆ դաշտային օգնական Մարիուս Պուոձիունասը/Լիտվա/, հայտնում է ԼՂՀ ԱԳՆ մամուլի ծառայությունը:

Ադրբեջանական կողմից դիտարկումն իրականացրել են ԳՆԱՆ դաշտային օգնականներ Քրիստո Քրիստովը/Բուլղարիա/, Անտալ Հերդիչը/Հունգարիա/ և Վիլյամ Պրայորը /Մեծ Բրիտանիա/:

Դիտարկումն անցել է ըստ սահմանված գրաֆիկի, կրակի դադարեցման ռեժիմի խախտումներ չեն արձանագրվել: Դիտարկման առաքելությանը ղարաբաղյան կողմից ուղեկցում էին ԼՂՀ արտաքին գործերի նախարարության և ԼՂՀ պաշտպանության նախարարության ներկայացուցիչները: