Ստամբուլում տեղի է ունեցել բանակում սպանված հայ զինվոր Սևակ Շահին Բալքրչիի հուղարկավորությունը, որը սպանվեց ապրիլի 24-ին Թուրքիայի զորամասերից մեկում: Նախօրեին հոգեհանգստի կարգ կատարվեց Ստամբուլի Սուրբ Վարդանանց հայկական եկեղեցում:
Ինչպես գրում է թուրքական Radikal-ը, սպանված պատանու հիշատակը եկել էին հարգելու ինչպես հայեր, այնպես էլ թուրքեր: Ծաղկեպսակներ են դրվել ինչպես զինվորականներից, այնպես էլ տեղական իշխանություններից, այդ թվում Ստամբուլի քաղաքապետից: Զինվորի թաղմանն ու հոգեհանգստի արարողությանը մասնակցել է ՀԱԵ Կոստանդնուպոլսի աթոռակից պատրիարք, արքեպիսկոպոս Արամ Աթեշյանը, ինչպես նաև Հրանտ Դինքի այրին:
Սևակին թաղեցին Ստամբուլի Շիշլի թաղամասի հայկական գերեզմանատանը:
Ապրիլի 24-ին Բաթմանի գավառի զորամասերից մեկում սպանվեց ծագումով հայ 25-ամյա Սևակ Շահին Բալքրչին: Մահվան հանգամանքների մասին տեղեկությունները տարաբնույթ են ու հակասական: Զեկույցներից մեկում ասվում է, որ «նա սպանվել է զենքի հետ անզգույշ վարվելու արդյունքում»: Մեկ այլ վարկածով, նրան միտումնավոր սպանել են ատրճանակից:
