Իտալիայի Ֆրիուլի-Վենեցիա Ջուլիա նահանգում նախատեսվում է ստեղծել հայկական մշակույթի կենտրոն` «Հայկական տուն», որը կզբաղվի ինչպես մշակութային փոխանակումներով, այնպես էլ մշակութային արժեքների և ավանդույթների (ոչ նյութական մշակույթ) պահպանման, լեզվամտածողության, պատմության գիտական ու գիտատեխնիկական համադրությունով տեղեկատվական բանկերի ստեղծմամբ և մի շարք այլ գիտամշակութային ծրագրերով:
Որպես առաջին քայլ` ՀՀ մշակույթի նախարար Հասմիկ Պողոսյանն ապագա «Հայկական տան» գրադարանին նվիրել է հայոց պատմական մայրաքաղաք Անիին, հայկական պատմամշակութային հուշարձաններին ու Փարաջանովին նվիրված գրքեր: Նա առաջարկել է «Հայկական տանը» համատեղ ուժերով բացել հայ գրատպության 500-ամյակին նվիրված գրքի ցուցահանդես:
Ինչպես տեղեկացնում է ՀՀ մշակույթի նախարարությունը, որոշումն ընդունվել է մայիսի 10-ին ՀՀ մշակույթի նախարար Հասմիկ Պողոսյանի և Իտալիայի Ֆրիուլի-Վենեցիա Ջուլիա նահանգի նախագահ Ռենզո Տոնդոյի գլխավորած պատվիրակության հանդիպման ժամանակ:
