«Իրանից հստակ և ամբողջական տեղեկատվություն չի ստացվում, առավել ևս իրանական ԶԼՄ-ներից»,- PanARMENIAN.Net-ի թղթակցին է ասել Սևծովյան և Կասպից տարածաշրջանի քաղաքական և սոցիալական հետազոտությունների ինստիտուտի տնօրեն Վլադիմիր Զախարովը: Սակայն, նա գտնում է, որ Իրանում իրոք լուրջ փոփոխություններ են տեղի ունենում: «Երկրի մի շարք քաղաքական գործիչների համար պարզ դարձավ, որ իսլամական Իրանը չի կարող գոյություն ունենալ առանց խիստ կրոնական վերահսկողության: Դա կարող է անել միայն հոգևորական դասը, սակայն դա 21-րդ դարի ճանապարհ չէ: Այդ պատճառով էլ առճակատում է գնում քաղաքացիական ու կրոնական հասարակությունների միջև»,-գտնում է փորձագետը:
Վլադիմիր Զախարովը գտնում է, որ երիտասարդությունը չի հրաժարվում հավատից, սակայն, ցանկանում է ապրել այնպես, ինչպես իրենց հասակակիցներն Արևմուտքում: «Թե ինչի կվերածվի դիմակայությունը, գործնականում անհնար է կանխագուշակել՝ դիմակայություն ԱՄՆ-ի, Արևմուտքի և մի շարք արաբական երկրների հետ: Իրանում հստակ գիտեն, որ ԱՄՆ ագրեսիայի դեպքում կարող են տեղի ունենալ փոփոխություններ, որոնք ոչ ոքի պետք չեն»,-ասել է նա:
