Մայիսի 30-ին` ժամը 12.00-ին, Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի առջև տեղի ունեցավ բողոքի ակցիա` նվիրված «Ժառանգություն» ընդդիմադիր կուսակցության պատգամավոր Զարուհի Փոստանջյանի եղբոր` Տիգրան Փոստանջյանի դեմ ապօրինի դատավարությանը: Ինչպես հաղորդում է «Ժառանգության» մամլո ծառայությունը, ակցիային մասնակցում էին բազմաթիվ քաղաքացիներ, «Ժառանգություն» կուսակցության վարչության անդամները, պատգամավորները, ովքեր պահանջում էին անհապաղ դադարեցնել անօրինական քրեական հետապնդումը և ազատ արձակել քաղաքական պատանդ Տիգրան Փոստանջյանին: Արդեն 20-րդ օրն է, ինչ Տիգրանը հացադուլի մեջ է, որով նա իր բողոքն է հայտնում «Նուբարաշեն» ՔԿՀ-ում տիրող նվաստացուցիչ պայմաններից և իր դեմ կիրառվող ապօրինի կալանքից:
Տիգրան Փոստանջյանը ձերբակալվել է փետրվարի 23-ին կաշառակերության մեղադրանքով: Նրա գործը վարում է Հայաստանի Ազգային անվտանգության ծառայության Քննչական կոմիտեն:
