Հունիսի 4-ին Կանաչաստան հասարակական կազմակերպությունը Երևանի քաղաքապետարանի հետ համագործակցությամբ, ԱՄՆ միջազգային զարգացման գործակալության և Քաունթերփարթ ինթերնեյշնլի հայաստանյան ներկայացուցչության աջակցությամբ իրականացրել է հանրային վայրերում ծխելն արգելող որոշումը խթանող երկրորդ արշավը: Այս անգամ արշավի շրջանակում այցելություններ են իրականացվել Երևանի հանրային այն վայրեր` սրճարաններ, ռեստորաններ, բարեր, սննդի կետեր և այլն, որտեղ չեն ծխում կամ առկա է չծխելու համար առանձնացված վայր: Ինչպես հայտնել է լրագրողներին «Կանաչաստան» կազմակերպության տնօրեն Տիգրան Ճորոխյանը, ակցիայի մասնակիցներն անցել են Երևանի փողոցներով և հանրային վայրերին շնորհակալագրեր հանձնել հետևյալ գրությամբ. «Շնորհակալություն մեր առողջության մասին հոգալու և հաստատությունում ծխելն արգելելու համար»: Նա նշել է, որ Հայաստանի կառավարության կողմից մշակվում են ենթաօրենսդրական ակտեր, որոնք թույլ կտան տուգանել արգելված վայրերում ծխելու համար:
Իր հերթին Երևանի քաղաքապետարանի առևտրի և սպասարակման վարչության գլխավոր մասնագետ Ալֆրեդ Հունանյանը նշել է, որ Երևանի քաղաքապետի կողմից մայիսի 17-ին որոշում է ընդունվել սահմանափակել ծխելը հանրային սննդի օբյեկտներում և հասարակական տրանսպորտում:Նա պարզաբանել է, որ այդ օբյեկտներում պետք է լինեն առանձին տեղեր չծխողների համար և հավելել, որ ինքն անձամբ թողնում է ծխելը և կոչ է արել մյուսներին նույնպես հետևել իր օրինակին:
