Հայաստանի ազգային գրադարանի աշխատակիցները դեմ են տնօրեն Դավիթ Սարգսյանին աշխատանքից հեռացնելուն, սակայն, չեն ցանկանում իրենց կարծքիը բարձրաձայնել լրագրողների հետ շփումներում: Հունիսի 16-ին գրադարանի փոխտնօրեն Ռաֆիկ Ղազարյանը պետք է ասուլիսով հանդես գար Երևանի մամլո ակումբներից մեկում, սակայն ասուլիսից մի քանի րոպե առաջ զանգահարել է՝ հայտնելով որ իրեն կանչել են ՀՀ մշակույթի նախարարություն և նա չի կարող մասնակցել հանդիպմանը:
Փոխարենը ասուլիսին մասնակցել է Հանրային խորհրդի սփյուռքի արտաքին կապերի և ազգային արժեքների ենթահանձնաժողովի անդամ Ռաֆիկ Թադևոսյանը՝ խոսելով ի պաշտպանություն Սարգսյանի: Նա ասաց, որ ինքը և գրադարանի 200 ընթերցող գնալու են մինչև վերջ: Սակայն ինչ է հասկանում մինչև վերջ ասելով, չմանրամասնեց: Նա նաև հավելեց, որ կհաշտվի իրողության հետ, եթե Սարգսյանը չմնա գրադարանի տնօրենի պաշտոնում:
Վերջերս ՀՀ մշակույթի նախարարությունը հայտարարել է, որ չի երկարացնելու գրադարանի տնօրեն Դավիթ Սարգսյանի պաշտոնավարման պայմանագիրը ժամկետը վերջանալու կապակցությամբ: Այս առիթով գրադարանում կազմակերպվել է ստորագրահավաք, ի պաշտպանություն տնօրենի և նամակներ ուղարկել Ազգային ժողով, ՀՀ կառավարություն, երկրի նախագահին և այլ մարմինների:
