Հայաստանում մշակվում է անօդաչու ինքնաթիռների չեզոքացմանն ուղղված լուրջ նախագիծ

PanARMENIAN.Net - Հայաստանի ԶՈւ պատրաստությունն այսօրվա դրությամբ թույլ կտա համարժեք պատասխան տալ հակառակորդին ռազմական գործողությունների դեպքում, հունիսի 18-ին հայտարարել է ՀՀ պաշտպանության նախարարության ավիացիայի պետի տեղակալ Արմեն Մկրտչյանը Երևանում տեղի ունեցած մամլո ասուլիսում, որը նվիրված էր «Հայաստանի ավիացիայի օրվան»:

Ըստ նրա, հայ օդաչուների մարտական ոգին թույլ տվեց հաղթել ղարաբաղյան պատերազմում տեխնիկայի փոքր քանակության առկայությամբ: Արմեն Մկրտչյանն ասել է, որ հայ ավիատորների պատրաստվածությունն իր մակարդակով շատ անգամ գերազանցում է հակառակորդի մասնագետների պատրաստվածությունը: Ավելին, ըստ նրա, հայ օդաչուների պրոֆեսիոնալիզմը բազմիցս է բարձր գնահատանքի արժանացել ինչպես ռուս, այնպես էլ օտարերկրացի փորձագետների կողմից: Արմեն Մկրտչյանը նաև հայտնեց, որ երկրում ձևավորվել են կադրերի նախապատրաստման սեփական ավանդույթները, կան կադրերի պատրաստման բարձրակարգ դպրոց և ինստիտուտ, որոնք նաև վերապատրաստում են անցնում արտերկրում: Այսօրվա դրությամբ հայ օդաչուները տիրապետում են բարձր պիլոտաժի արվեստին, նրանց համար բարդ չէ ցանկացած «կետային հարված» հասցնել ցանկացած օբյեկտի:

Ինչ վերաբերում է ԶՈւ նվաճումներին, ապա, ըստ Արմեն Մկրտչյանի, վերջին տարիներին զգալի առաջընթաց է գրանցվել: Մասնավորապես, Հայաստանում ձեռնամուխ են եղել անօդաչու սարքերի արտադրությանը, նման սարքեր են ներկրվել նաև արտերկրից: Հայաստանում նաև մշակվում է անօդաչու ինքնաթիռների չեզոքացմանն ուղղված լուրջ նախագիծ:

«Հայաստանի ավիացիայի օրը» նշվում է ամեն տարի հունիսի երրորդ կիրակի օրը: ՀՀ ավիացիայի ստեղծման մեկնակետն է համարվում ՀՀ ԶՈւ ավիցիոն ստորաբաժանման կազմավորումը 1992թ. հունիսին: 5 տարի անց այդ իրադարձության առթիվ ՀՀ առաջին նախագահ Լևոն Տեր-Պետրոսյանը հրամանագիր ստորագրեց «Հայաստանի ավիացիայի օրը» տոնելու մասին: